Seinnipartinn í dag veiddist draumafiskur í Veiðivötnum á Landmannaafrétti. Það var Egill Ingibergsson sem datt í lukkupottinn og var algjörlega í skýjunum. "Þetta var Magic moment! Það var stafalogn og ég í rauða gýgnum á leiðinni upp að Litla sjó," sagði Egill við heimildarmann Flugufrétta nú í kvöld.
Hann bætti því við að töfrastundin hafi kallað fram brjálaða töku stórfiska. Egill náði þremur fiskum, þar á meðal var einn 70 sm eða um 10 pund, og tveir aðrir 5-6 punda. Allir tóku þeir lítinn hvítan Nobbler, hnýttan á öngul nr. 10. ?Slagurinn við þann stærsta var rosalegur. Hann tók tvær rokur langt niður á undirlínu, ekki svona í rykkjum með tilhlaupi, heldur fast og ákveðið í einum rykk og það rauk úr hjólinu!? sagði Egill þegar hann lýsti viðureigninni við urriðann góða.
Nú er um vika síðan veiðin hófst í Veiðivötnum og hún hefur verið upp og niður, eins og gengur, allt eftir veðri og aðstæðum. Egill stundi því upp að hann væri búinn að veiða ágætlega á flugu en kvaddi síðan til að fá næði til að jafna sig og dást að urriðanum stóra. "Magic moment" eru orð að sönnu! Við lofum mynd af fiskinum góða í Flugufréttum í næstu viku.
Meðfylgjandi mynd er af Agli Ingibergssyni með snotran 48 sm urriða úr Litlá í Kelduhverfi. Skömmu áður en myndin var tekin sleppti hann 69 sm urriða en því miður var engin myndavél nálæg þá. Seinna sama haust náði hann 69 sm trölli úr Laxá í Mývatnssveit sem vigtaði 10,5 pund. Egill er stórurriðaveiðimaður! Myndina tók veiðifélagi Egils, Þórarinn Blöndal.
LEIT