.jpg)
Stærðarinnar bleikja úr Neshyl í Brunná.
Hér er sagt stuttlega frá þremur frábærum ám á Norð-austur horninu. Ekki er tóm til að gera þeim glögg skil frá upphafi til enda hér. Þær eru ólíkar og allar krefjandi á sinn hátt. Fyrir þá sem leita að nýjum og spennandi slóðum eru þetta góðir kostir, gamlir vinir þurfa enga örvun.
Brunná í Öxarfirði er gullfalleg 4 stanga sjóbleikju og sjóbirtingsá. Umhverfi Brunnár er stórfenglegt og veiðistaðir sérstaklega fallegir og fjölbreytilegir. Áin fellur á kafla um skógi vaxið land og neðan til sameinast hún kvísl úr Jökulsá og myndar hin eftirsóttu skil tærs og skolaðs vatns. Þar er frábær veiðistaður. Hylurinn undir brúnni við þjóðveginn er líka öflugur. En enginn skyldi vanmeta þá gæfu sem felst í að leita þær stóru uppi ofar í ánni og þar eru forkunnarfagrir staðir.
Áin er oft vandveidd og viðkvæm svo hún er ögrun fyrir góða veiðimenn. Hún er frekar smá og skiptast á strengir og breiður.
Eingöngu verður veitt með flugu í Brunná. Veið hefst í ánni snamma vors, en þá er sjóbleikjan farin að sýna sig. Sjóbirtingur gengur í Brunná á hefðbundnum tíma þegar halla fer hausti.
Lögð verður áhersla á góða umgengni við ána og umhverfið allt þannig að menn skilji ekkert eftir sig nema fótsporin.
Sjá nánar á brunna.is/
Litlá í Kelduhverfi
Litlá er annáluð veiðiá vegna stórra fiska. Hún er hlý allan ársins hring vegna vermsla sem renna í hana. Þarna er sjóbirtingur, staðbundinn urriði (em væntanlega gengur öðru hverju til sjávar) og bleikja sem getur orðið góð. Lax flækist um ána líka.
Eingöngu verður veitt á flugu og fiski sleppt (catch & release).
Lögð verður áhersla á góða umgengni við ána og umhverfið allt þannig að menn skilji ekkert eftir sig nema fótsporin. Veiðileyfi í Skjálftavatn fylgir með Litluá, þar er frábær veiði á stórri bleikju ásamt urriðum.
Áin rennur mest breið og lygn milli gróinna bakka. Þarna er náttúrufegurð mikil fyrir þá sem unna víðáttum og sýn til hafs. Nánar um ána og keyptu veiðileyfi á www.litlaa.is
Lónsá í Þistilfirði
Lónsá er á norðanverðu Langanesi um 10 mínútna akstur frá Þórshöfn. Þetta er nett 4 stanga sjóbleikju og sjóbirtingsá. Ofan óssins sem er stuttur en gjöfull er innlón og svo tekur við 2 kílómetra kafli þar sem áin rennur um grösugar engjar og tún. Boðið er uppá þægilega gistingu á Ytra ? Lóni en um mínútu gangur er að næsta veiðistað.
Gistingin er búin öllum þægindum, snyrtileg og hlýleg og rekin í anda farfuglaheimila.
Umhverfið er sérstakt t.d. er fuglalíf fjölbreytt og ekki skemmir að þarna leyfast næturveiðar. Miðnætursólin verður vart fegurri en á Langanesi.
Lónsá á það til að breyta sér mikið í ósnum og stundum er þar mikill þari eftir brim og erfitt að athafna sig. Maíveiðin getur því verið áhættusöm og rysjótt ef mann fara langar leiðir og gæta þarf að því að vart er að vænta fiskjar nema í ósnum og neðsta hluta árinnar. Síðla sumars er bleikjan komin upp ána og þá þarf að vanda sig og varast viðkvæma staði. Hér eru þurrflugumenn í essinu sínu.
Matthías Hákonarson sér um sölu veiðileyfa í Lónsá.
LEIT