Við, Sigþór, Kalli og undirritaður, erum staddir í Veiðihúsinu Hofi í Mývatnssveit að borða morgunmat. Þetta er önnur veiðiferð hópsins í Mývatnssveitina sumarið 2019. Eftir stórskemmtilega kvöldvakt á Geirastöðum kvöldið áður eru menn misæstir að koma sér af stað niður á Hamar fyrir síðustu morgunvaktina. Veðrið er fallegt, sólin skín og hægur andvari. Það eru allir tilbúnir í vaktina en Sigþór er óþreyjufullur og tönglast í sífellu á því að við þurfum að koma okkur af stað. Takturinn hjá okkur Kalla er aðeins hægari en það þarf ekkert að snúa upp á hendina á okkur, við erum á leiðinni. Oft er þessu nú þveröfugt farið en það er önnur saga.
Sigþór mættur og byrjaður að egna fyrir alvöru fiskum
Hálfhissa á æsingnum í Sigþóri keyrum við niður eftir og hann rýkur af stað um leið og bílnum er lagt. Við röltum svo á eftir honum og heyrum hann skríkja upp af geðshræringu út undan okkur, "ég sagði ykkur það, það er fiskur í uppítöku út um allan hrygginn". Þvílík draumsýn, stórir urriðar súpa á flugum, hausinn uppúr og bakið fylgir, stundum aðeins goggurinn. Sigþór er kominn að Hesthúsflóanum og byrjar að þenja köstin því þarna þarf að kasta langt til að eitthvað vit sé í rekinu. Við Kalli fylgjumst með álengdar og fylgjumst með Sigþóri ganga aftur í barndóm af spenningi. Nú má ekki misskilja þetta sem svo að við höfum ekki verið peppaðir því við vorum það sannarlega líka, en við vildum sjá dæmið ganga upp áður en við vættum buxurnar. Sigþór var ekki lengi að fá viðbrögð, fiskarnir skoða þurrfluguna hjá honum í þrí- eða fjórgang áður en hann festir í góðum fiski. BINGÓ. Þarna vorum við auðvitað löngu komnir til hans og farnir að lifa okkur inn í allar tilraunir höfðingjanna á Hesthúsflóa hryggnum. Hálf óöruggur með að ná almennilegu reki á þessum stað tók ég við stönginni hjá Sigþóri og byrjaði að kreista út alla auka metra sem ég fann. Við vorum með 10" stöng og höfðum allir gott af þessu auka feti. Lengdin var samt að stríða mér og bakkinn að flækjast fyrir mér. Þegar eitt kastið datt á réttan stað þá fengum við viðbragð en festum ekki í fiskinum. Aftur gekk dæmið upp og núna festist flugan á réttum stað. BINGÓ í sal.
Þurrflugan Galdralöpp á góðum stað í kjaftinum
Eftir stórkostlegan tíma á Hesthúsflóa rifum við okkur af stað og röltum niður í Hrafnstaðaey þar sem við lentum í svipuðum málum. Stórir og flottir fiskar í uppítöku, ótrúlegur morgun í frábærum félagsskap. Svona morgnar ilja manni á köldum vetrarkvöldum.
LEIT