Veiðistaðurinn minn:
Oddstaðafljót í Grímsá
Nú eru fáeinir dagar þar til laxveiðin hefst og því er vel við hæfi að staðurinn sem verður fyrir valinu sem uppáhaldsveiðistaður sé í þeirri frægu laxveiðiá Grímsá. Það er stórfiskabaninn Svend Richter sem horfir dreymnum augum til Borgarfjarðarins.
Oddstaðafljót er efsti veiðistaðurinn í Grímsá, rétt fyrir neðan þar sem Tunguá fellur í hana. Lengi vel var þetta einn besti veiðistaðurinn í ánni, sérstaklega þegar líða tók á sumarið. Þetta var uppáhalds veiðistaður okkar Kolbeins Grímssonar heitins en við veiddum saman í Grímsá í áratugi.
Bunkar af laxi
Oddstaðafljót er mjög langur veiðistaður og tökustaðir geta verið nánast um allt fljótið, þótt heitustu staðirnir séu gjarnan rétt fyrir ofan smávik eða síki sem nú er að mestu horfið. Í miklu vatni tekur fiskur gjarnan neðar og getur legið alveg niður á broti.
Á gullaldarárum fljótsins bunkaðist laxinn um allan veiðistaðinn en nú má segja að næsti staður fyrir neðan, Efsti hylur, hafi í raun tekið við megninu af laxinum. Samt sem áður fæ ég alltaf sæluhroll þegar ég veiði Oddstaðafljót.
Eins og oft er með veiðistaði sem geyma mikið af laxi og eru veiddir nánast 12 tíma á dag, þá hrökkva þeir í gang einhvern tímann dagsins og þá getur takan verið mjög mikil en þess á milli er ekkert að gerast, hann sýnir sig mikið en tekur illa eða alls ekki.
Sagan af því þegar Kolbeinn eignaðist næstum því fljótið
Kolbeinn Grímsson var, eins og ég, mjög hrifinn af Oddstaðafljóti og ef hann vissi að við ættum fljótið seinni vakt dagsins þá gat hann með engu móti hvílst eða lagt sig í hléinu, hann hreinlega iðaði af spenningi.
Ég benti honum á að hann ætti góðan möguleika á því að eignast Oddstaðafljót: Ekkja ein sterkefnuð bjó nálægt honum og hvatti ég hann til að krækja sér í hana því ef það tækist þá gæti hann keypt Oddstaðafljót.
Ekkert gekk með þessi áform þrátt fyrir hvatningar mínar uns tækifærið kom. Ekkjan var að bakka smábíl frá heimili sínu um vetur og festi hann í snjóskafli. Minn maður skundaði út á inniskónum, lagðist á afturstuðarann, bíllinn fór af stað en Kolbeinn féll í götuna og rifbeinsbrotnaði. Ekkjan ók á brott, vissi ekkert af greiðasemi Kolbeins og þar með var draumurinn um Oddstaðafljót úr sögunni.?
LEIT