Staðfest er að síðustu daga hafa a.m.k. þrír regnbogasilungar veiðst í Varmá, líklega fleiri. Stjáni Ben hjá SVFR sagði í samtali við Flugufréttir í kvöld að verið væri að rannsaka málið og að a.m.k. einn fiskanna væri augljóslega strokufiskur úr sjókvíaeldi, sporð- og uggaétinn.
Síðustu áratugi hafa annað slagið veiðst sjógengnir regnbogasilungar í Varmá, svokallaðir stálhausar, en þeir hafa verið silfraðir og vel á sig komnir, með nokkuð heilan sporð og ugga. Hefur því jafnvel verið haldið fram að hrygning regnbogasilungs hafi einhvern tímann tekist í Varmá vegna þess hversu hátt hitastig árinnar er.
Hér er eitthvað allt annað á ferðinni. Hefur enn ein kvíin brostið eða eru þetta fiskar úr slysasleppingunni síðasta sumar?
Haus af einum fiskanna hefur verið sendur til MAST til skoðunar og sannleikurinn um upprunann kemur vonandi í ljós innan tíðar.
LEIT