Fréttaritari flugur.is sló á þráðinn til helstu söluaðila veiðileyfa hérlendis og spurðist fyrir um farveg mála sem upp koma í tengslum við veiðiþjófnað og brot á reglum við vatnasvæði viðkomandi. Svör eru svipuð og í meginatriðum fara mál ekki lengra. Það er að ef aðili brýtur af sér fer hann á svartan lista hjá viðkomandi.
Halli Eiríks hjá SVFR benti hins vegar á að málin geta orðið snúin ef um er að ræða að aðili lánar nafn sitt t.d. í umsókn, því það er alltaf rétthafi veiðileyfis sem ber ábyrgð og því getur sá aðili lent í því að taka ábyrgð á hegðun annarra veiðimanna. Hjá SVFR eru brot tekin fyrir á stjórnarfundi sem svo metur
aðstæður viðkomandi og má að jafnaði gera ráð fyrir 2-3 slíkum málum á ári. Þekkt er að menn fái úthýsingu frá veiðileyfakaupum í allt að 3 ár.
Stefán Páll hjá Lax-á sagði að brot af þessu tagi væru ekki algeng, svona 5-15 brot að meðallagi á ári og þá helst í minni ám og á afskekktari stöðum. Sama er á teningnum hjá Lax-á varðandi refsingu, straff og svartur listi eru meðölin. Þó væri það þannig að ákveðnir einstaklingar og holl væru ekki velkomnir gestir aftur hjá þeim en flestir væru á lista í ákveðinn tíma. Stefán Páll man ekki eftir því að málum hafi verið vísað áfram.
Þröstur hjá Stengjum sagði slík mál afskaplega sjaldgæf, kannski 3 þau 15 ár sem hann hefur staðið í svona rekstri. Þröstur sagði að mönnum væri gefin viðvörun ef um brot væri að ræða og síðan vísað frá ef ekki er hlustað.
Það er því ljóst að almenna reglan er sú að vísa mönnum af veiðistað að undangenginni aðvörun og síðan svartur listi í ákveðinn fjölda ára.
LEIT