Það er margt sem ber á góma í veiðiferð. Fréttaritari flugur.is var fyrir stuttu staddur í Flekku og voru menn að ræða ýmislegt óvenjulegt sem hent hefur í laxveiði. Þessi fréttaritari sagði þá sögu frá árinu 2008 sem gerðist við Langá, en við Nils Jörgensen guide og veiðisnillingur með meiru vorum þar að rölta niður með ánni í leit að fiski. Þá ber svo við að ég kem auga á rjúpnapar á vappi og styggðust fuglarnir lítið við ferðir okkar.
Nils Jörgensen með rjúpuna við Langá.
Ég montaði mig þá af því að hafa veitt þessa fugla í tugi ára og talaði um jólin og annað sem þeim tengdist. Nils stóð um 10-15 metra frá fuglunum og spurði hvort hann ætti að veiða þá, ég hló við og sagðist ekki hafa séð það gert með flugustöng áður. Nils dró þá
út línu og falskastaði 2-3, síðan kastaði hann á rjúpurnar og náði í fyrsta kasti að krækja flugunni um löppina á kvenfuglinum og dró hana inn með yfirvegun. Karrinn var mjög ósáttur við aðfarinar og lét ófriðlega. Eftir að hafa handfjatlað rjúpuna stutta stund losaði Nils fluguna, og taka ber fram að flugan kræktist utan um línuna en festist ekki í fuglinum, og gaf rjúpunni frelsi.
Mér þótti mikið til koma, og þá sérstaklega að ná henni óskaddaðri í fyrsta kasti og sagði þessa sögu í áðurnefndri ferð í Flekku. Menn ræddu þetta aðeins og síðan var haldið til veiða. Fiskurinn tók frekar illa í þessari ferð, lítið vatn og veðurblíða var allsráðandi og laxinn latur.
Síðasta daginn bar þó til tíðinda en svo vildi til að einn veiðifélaginn, Ingþór Ásgeirsson orðaður við Eymundsson, náði að galdra upp tvo laxa með frekar óvenjulegri veiðiaðferð, en hann snaraði laxana, þ.e. að línan vafðist utan um fiskana án þess að þær tækju fluguna. Hann var heldur brattur í lokin og átti þessi fleygu orð:
Rjúpa hvað!
LEIT