Árni Baldursson eigandi Lax-ár skrifaði hugleiðingar inn á vef fyrirtækisins fyrir skömmu. Þar lýsir hann skoðun sinni á stórlaxaverndun og styður ákall veiðimálastjóra um verndun stórlaxins. Hann er sammála því að láta laxinn njóta vafans og ætlar að leggja til við veiðifélag Blöndu að banna maðkaveiði og krefjast þess að öllum laxi yfir 70 sm. verði sleppt. Það verður að taka ofan fyrir þessari viðleitni Árna og nýta skriðþungan sem þessi umræða er að fá.
Blöndulaxar frá opnun nú í vor.
Það hefur mikið gengið á undanfarið í umræðum um þessi mál og sérstaklega varð umræðan hávær eftir góða opnun Blöndu í júní. En Árni bendir hins vegar réttilega einnig á að netaveiði á líklega sinn
þátt í að fækka stórlaxi því netin eru víða niðri á þeim tíma sem stórlaxinn gengur upp. Árni telur að ekki eigi að vera heimild netaveiði á laxi fyrir 20. júlí ár hvert.
En þá spyrja sig hvort netaveiði á laxi eigi yfir höfuð rétt á sér? Hefur ekki fyrir löngu verið sýnt fram á að stangarveiddur lax skilar margfalt meiri arði en netaveiddur? Væri ekki lag um þessar mundir að finna fyrirkomulag sem gerir það að verkum að netabændur sjái hag sínum borgið með öðru en að draga fyrir lax og síðan er reglan um meiri hagsmuni fyrir minni, sem er jú ansi sterk?
Það hafa heyrst raddir um að netaveiði eigi rétt á sér í hinum og þessum ám af því svo lítið veiðist á stöng, en er það svo? Ef vernda á gen stórlaxins skiptir litlu hvar hann er drepinn.
Þessi mál eru í miklum ólestri hér á landi og þörf er á að endurskoða lagaramman í kringum veiði á laxfiskum að mati fréttaritara, því varla gengur að berja á örfáum maðkakörlum á sama tíma og netaveiddur stórlax liggur á klaka í fiskbúðinni.
LEIT